ஹெட்ரிக்…! சில சுவாரஷ்சியமான தகவல்கள்…!

• சுற்றுலா சிம்பாப்வே அணிக்கும், பங்களாதேஷ் அணிக்குமிடையிலான 5 போட்டிகளைக் கொண்ட ஒரு நாள் சர்வதேச கிரிக்கெட் தொடரினை பங்களாதேஷ் 5-0 என வெள்ளையடிப்பு செய்து சாதனை படைத்தது.
  

இந்த ஒருநாள் தொடரில், கடந்த டிசம்பர் 1ம் திகதி டாக்காவில் இடம்பெற்ற 5 ஆவது ஒருநாள் போட்டியில் அறிமுக வீரராகக் களமிறங்கிய பங்களாதேஷ் அணியின் சுழற்பந்து வீச்சாளர் தைஜுல் இஸ்லாம் தனது அறிமுக ஒருநாள் போட்டியில் ஹெட்ரிக் விக்கெட் வீழ்த்தி உலகசாதனை படைத்துள்ளார். ஒருநாள் சர்வதேச போட்டிகளில் ஹெட்ரிக் எடுக்கும் 4 ஆவது பங்களாதேஷ் பந்துவீச்சாளர் தைஜுல் ஆவார். இதற்கு முன்பு ஷஹாதது குசைன், அப்துர் ரசாக், மற்றும் ரூபல் குசைன் ஆகியோர் ஒருநாள் போட்டிகளில் ஹெட்ரிக் சாதனை நிகழ்த்தியுள்ளமை குறிப்பிடத்தக்கது.

• தனது அறிமுக டெஸ்ட் போட்டியிலேயே ஹெட்ரிக் விக்கட் வீழ்த்தியோர் டேமியன் பிளெமிங் (அவுஸ்திரேலியா Vs பாகிஸ்தான் - 1994/95), பீற்றர் பெதரிக் (நியூசிலாந்து Vs பாகிஸ்தான் - 1976/77), மொரிஸ் அல்லோம் (இங்கிலாந்து Vs நியூசிலாந்து 1929/30) ஆகியோராவர்.

• கிரிக்கெட் அரங்கில் அதிக எண்ணிக்கையான ஹெட்ரிக் சாதனைகள் நிகழ்த்தப்பட்ட ஆண்டு 1999 ஆகும். இந்த ஆண்டில் 4 ஹெட்ரிக் சாதனைகள் நிகழ்த்தப்பட்டன.

• பாகிஸ்தான் அணியின் சார்பாக டெஸ்ட் கிரிக்கெட்டில் இதுவரை 4 ஹெட்ரிக் சாதனைகள் நிகழ்த்தப்பட்டுள்ளன. இந்த 4 ஹெட்ரிக் சாதனைகளும் இலங்கை அணிக்கெதிராகவே நிகழ்த்தப்பட்டுள்ளமை குறிப்பிடத்தக்கதாகும்.

• டெஸ்ட் கிரிக்கெட்டில் முதல் ஓவரின் முதல் மூன்று பந்துகளிலும் விக்கெட் வீழ்த்தி ஹெட்ரிக் சாதனை புரிந்த ஒரே வீரர் இலங்கை அணியின் நுவான் சொய்ஸா ஆவார். சிம்பாப்வே அணிக்கெதிராக 1999/00ம் ஆண்டு ஹராரோயில் இந்த சாதனை நிகழ்த்தப்பட்டது.

• டெஸ்ட் மற்றும் ஒருநாள் கிரிக்கெட் ஆகிய இரண்டு வகையான போட்டிகளிலும் ஹெட்ரிக் சாதனை நிகழ்த்தியவர்கள் பாகிஸ்தான் அணியின் முஹம்மட் சமி மற்றும் வசிம் அக்ரம் ஆகியோராவர். குறிப்பாக, வசிம் அக்ரம் டெஸ்ட் மற்றும் ஒருநாள் கிரிக்கெட் ஆட்டங்களில் தலா இவ்விரண்டு முறை ஹெட்ரிக் சாதனை நிகழ்த்தி கிரிக்கெட் அரங்கில் அதிக தடவை ஹெட்ரிக் சாதனை நிகழ்த்திய வீரராக விளங்குகின்றார்.

• டெஸ்ட் கிரிக்கெட் வரலாற்றில் ஒரே போட்டியில் ஹெட்ரிக் சாதனையுடன், சதமும் பெற்ற ஒரே வீரர் பங்களாதேஷ் அணியின் சொஹக் காசி ஆவார். நியூசிலாந்து அணிக்கெதிரான (2013ம் ஆண்டு) டெஸ்ட் போட்டியில் இந்த சாதனையினை நிகழ்த்தியுள்ளார். முறையற்ற பந்துவீச்சு காரணமாக சொஹக் காசிக்கு ஐ.சி.சி தற்சமயம் தடைவிதித்துள்ளமை குறிப்பிடத்தக்கது.
  

• கிரிக்கெட் அரங்கில் மிக இளவயதில் ஹெட்ரிக் சாதனை நிகழ்த்தியவர் பாகிஸ்தானின் அணியின் அகிப் ஜாவிட் ஆவார்.  1991ம் ஆண்டு சார்ஜாவில் இந்திய அணிக்கெதிரான ஒருநாள் சர்வதேச கிரிக்கெட் போட்டியில் இந்த சாதனையினை நிகழ்த்தும்போது அகிப் ஜாவிட்டின் வயது 19 ஆண்டுகள் 81 நாட்கள் ஆகும்.

• ஒரே டெஸ்ட் போட்டியின் இரண்டு இன்னிங்ஸ்களிலும் ஹெட்ரிக் சாதனை நிகழ்த்திய ஒரேவீரர் அவுஸ்திரேலிய அணியின் ஜிம்மி மத்தியூஸ் ஆவார். 1912ம் ஆண்டு தென்னாபிரிக்க அணிக்கெதிரான போட்டியில் அவர் இந்த உலகசாதனையினை நிகழ்த்தினார். இந்த டெஸ்ட் போட்டியில் ரொமி வார்ட்டினை ஒரே நாளில் இரண்டு தடவைகள் ஆட்டமிழக்கச் செய்தமை குறிப்பிடத்தக்கது.

• 4 பந்துகளில் தொடர்ச்சியாக 4 விக்கட்களை வீழ்த்திய ஒரே வீரர் இலங்கை அணியின் வேகப் பந்துவீச்சாளர் லசித் மலிங்க ஆவார். 2007ம் ஆண்டு உலகக்கிண்ண கிரிக்கெட் தொடரில் தென்னாபிரிக்க அணிக்கெதிரான போட்டியில் மலிங்க இச்சாதனையினை நிகழ்த்தினார். அத்துடன், உலகக்கிண்ண கிரிக்கெட் போட்டிகளில் இரு தடவைகள் (2007 & 2011 Vs கென்யா) ஹெட்ரிக் சாதனை நிகழ்த்திய ஒரே வீரர் என்கின்ற சாதனை மற்றும் ஒருநாள் சர்வதேச கிரிக்கெட் போட்டிகளில் 3 முறை ஹெட்ரிக் சாதனை நிகழ்த்திய ஒரே வீரர் என்கின்ற சாதனையும் இவருக்கே உரியதாகும்.
  

மகாத்மா காந்தியினை கெளரவப்படுத்திய உலக நாடுகளின் அஞ்சல் துறை…!

இந்திய தேசத் தந்தை மகாத்மா காந்தி அவர்களின் 145வது ஜனன தினம் இன்றாகும். இந்திய தேசத்திற்கு சுதந்திரத்தை பெற்றுக்கொடுக்க அயராது பாடுபட்ட அண்ணல் மகாத்மா காந்தி அவர்களை கெளரவப்படுத்தி உலகின் பல்வேறு நாடுகள் அஞ்சல்களை வெளியிட்டுள்ளன. அவை தொடர்பான சில சுவையான தகவல்கள் இதோ…!

• மகாத்மா காந்தி அவர்களினை கெளரவப்படுத்தி முதல் தபால் முத்திரையினை இந்தியா 1948ம் ஆண்டு ஆகஸ்ட் 15ம் திகதி வெளியிட்டது.

• இந்திய தேசம் நீங்கலாக, உலகளாவியரீதியில் பல்வேறு நாடுகள் மகாத்மா காந்தியை கெளரவப்படுத்தி இதுவரை 300 இற்கும் மேற்பட்ட அஞ்சல்களை வெளியிடப்பட்டுள்ளன.

• இந்திய தேசம் தவிர, மகாத்மா காந்தியை கெளரவப்படுத்தி தபால் முத்திரையினை வெளியிட்ட முதல் நாடு ஐக்கிய அமெரிக்கா ஆகும். 1961ம் ஆண்டு ஜனவரி 26ம் திகதி இம்முத்திரை வெளியிடப்பட்டது. இரண்டாவது நாடு கொங்கோ, 1967ம் ஆண்டு இம்முத்திரை வெளியிடப்பட்டது.

• மகாத்மா காந்தியின் நூற்றாண்டு பிறந்த நாள் கொண்டாட்டங்கள் 1969ம் ஆண்டு அக்டோபர் 2ம் திகதி கொண்டாடப்பட்டது. இதே தினத்தில் மகாத்மா காந்தியை கெளரவப்படுத்தி 40இற்கும் மேற்பட்ட உலக நாடுகள் தபால் முத்திரையினை வெளியிட்டன.

• மகாத்மா காந்தியை கெளரவப்படுத்தி தபால் அட்டையினை வெளியிட்ட முதல் நாடு போலந்து ஆகும்.

• இந்திய தேசம் தவிர, மகாத்மா காந்தியை கெளரவப்படுத்தி நினைவுத் தபால் உறையினை வெளியிட்ட முதல் நாடு ரொமானியா ஆகும்.

• மகாத்மா காந்தியை கெளரவப்படுத்தி அஞ்சல் திகதி முத்திரையினை வெளியிட்ட முதல் நாடு மியன்மார் ஆகும். செக்கோஸ்லாவியா, லக்ஸம்பேர்க் ஆகிய நாடுகளும் மகாத்மா காந்தியை கெளரவப்படுத்தி அஞ்சல் திகதி முத்திரையினை வெளியிட்டுள்ளன.

• மகாத்மா காந்தியை கெளரவப்படுத்தி இலங்கை 1988ம் ஆண்டு 75சத பெறுமதியான முதல் தபால் முத்திரையினை அவரின் 40வது நினைவு தினத்தில் வெளியிட்டது.

• ஐக்கிய நாடுகள் பொதுச் சபையானது மகாத்மா காந்தியின் பிறந்த தினமான அக்டோபர் 2ம் திகதியை சர்வதேச வன்முறையற்ற நாளாக 2007ம் பிரகடனப்படுத்தியது. இதற்கு மேலதிகமாக 2009ம் ஆண்டு அக்டோபர் 2ம் திகதி மகாத்மா காந்தியை கெளரவப்படுத்தி தபால் முத்திரையினை வெளியிட்டது.

***

ஆசிய விளையாட்டு போட்டிகள் ஒருபார்வை….!

17வது ஆசிய விளையாட்டு போட்டிகள் (ஆசியாட்) தென்கொரியாவின் இன்சொன் நகரில் கடந்த செப்டெம்பர் 19-ம் திகதி உத்தியோகபூர்வமாக ஆரம்பமாகின.

16 தினங்கள் நீடிக்கும் இப்போட்டிகளில் ஆசிய ஒலிம்பிக் பேரவையில் அங்கம் வகிக்கும் 45 நாடுகளைச் சேர்ந்த சுமார் 13,000 வீர, வீராங்கனைகள் பங்கேற்கின்றனர். 17வது ஆசிய விளையாட்டு விழாவில் 36 வகையான விளையாட்டுப் போட்டிகளில் 439 பிரிவுகளில் போட்டிகள் நடைபெறவுள்ளன.

1986 (சியோல்), 2002 (பூசான்) ஆகிய ஆசிய விளையாட்டுப் போட்டிகளைத் தொடர்ந்து மூன்றாவது தடவையாக (2014 இன்சொன்) தனது சொந்த மண்ணில் தென்கொரியா ஆசிய விளையாட்டுப் போட்டிகளை அரங்கேற்றுகின்றது.

ஆசிய விளையாட்டு போட்டிகள் தொடர்பிலான சில சுவையான தகவல்கள்…!

• 1வது ஆசியவிளையாட்டுப் போட்டி இந்தியாவின் புதுடில்லி நகரில் 1951ம் ஆண்டு மார்ச் 4-11ம் திகதி வரை நடைபெற்றன. இதில் 11 நாடுகளின் பங்கேற்புடன், 6 வகையான விளையாட்டுப் போட்டிகளில் 491 வீர, வீராங்கனைகள் பங்கேற்றனர்.

• 1982ம் ஆண்டுவரை ஆசிய விளையாட்டுப் போட்டிகளை ஆசிய விளையாட்டுகள் சம்மேளனம் ஒழுங்கமைத்தது ஆனால் தற்சமயம் ஆசிய ஒலிம்பிக் சம்மேளனமே ஆசிய விளையாட்டுப் போட்டிகளை ஒழுங்கமைத்து வருகின்றது.

• ஆசிய விளையாட்டுப் போட்டிகளை அதிக தடவைகள் நடாத்திய நாடு தாய்லாந்து ஆகும். 1966, 1970, 1978, 1998 ஆகிய ஆண்டுகளில் தாய்லாந்து ஆசிய விளையாட்டுப் போட்டிகளை நடாத்தியுள்ளது.

தாய்லாந்து, பாங்கொக் நகரில் இதுவரை நடைபெற்ற 4 ஆசிய விளையாட்டுப் போட்டிகளும் டிசம்பர் 20ம் திகதியிலேயே நிறைவுற்றுள்ளன என்பது சிறப்பு அம்சமாகும். அத்துடன் இப்போட்டிகள் அனைத்தும் தாய்லாந்து மன்னர் பூமிபோல் அதுல்யாதேவ் அவர்களினாலேயே ஆரம்பித்து வைக்கப்பட்டமை குறிப்பிடத்தக்கதாகும்.

• ஆசிய விளையாட்டுப் போட்டிகளில் தங்கப்பதக்கம் பெற்ற முதல் வீரர் சிங்கப்பூரினைச் சேர்ந்த N.C.கொக். (1500 மீற்றர் ப்ரீஸ்டைல் நீச்சல்)

• 1994ம் ஆண்டு ஆசிய விளையாட்டுப் போட்டிகள் ஜப்பான், ஹீரோசிமா நகரில் நடைபெற்றன. தலைநகருக்கு வெளியே ஆசிய விளையாட்டுப் போட்டிகள் நடத்தப்பட்ட முதல் சந்தர்ப்பம் இதுவேயாகும்.

• இதுவரை நடைபெற்ற ஆசிய விளையாட்டுப் போட்டிகளில் மாலைதீவு, பூட்டான், கிழக்கு தீமோர் ஆகிய நாடுகள் ஒரு பதக்கத்தினையேனும் வெற்றிகொள்ளவில்லை.

• இதுவரை நடைபெற்றுள்ள அனைத்து ஆசிய விளையாட்டுப் போட்டிகளிலும் பங்கேற்ற மொத்த நாடுகள் 7ஆகும். அவையாவன; இலங்கை, இந்தியா, இந்தோனேசியா, ஜப்பான், சிங்கப்பூர், தாய்லாந்து, பிலிப்பைன்ஸ் ஆகியனவாகும்.

• ஆசிய விளையாட்டுப் போட்டி வரலாற்றில் முதல் 8 அத்தியாயங்களிலும் (1951-1978) தங்கப் பதக்கப் பட்டியலில் முதல் இடத்தை ஜப்பான் வகித்து வந்தது, ஆயினும் 1982ம் ஆண்டிலிருந்து இற்றைவரை பதக்கப் பட்டியலில் முதல் இடத்தினை சீனா தனதாக்கிக் கொண்டது.

• பொருளாதார நெருக்கடி காரணமாக 18வது ஆசிய விளையாட்டுப் போட்டிகளை நடத்தமுடியாது என வியட்நாம் அறிவித்ததையடுத்து, 2019ம் ஆண்டு (2018-ம் ஆண்டு நடைபெற திட்டமிடப்பட்டது) இந்தோனேசியாவின் ஜகார்த்தாவில் 18வது ஆசிய விளையாட்டுப் போட்டி நடைபெறும் என ஆசிய ஒலிம்பிக் சம்மேளனம் அறிவித்துள்ளது. இதற்கு முன்னர் 1962-ல் இந்தோனேசியாவின் ஜகார்த்தாவில் ஆசிய விளையாட்டுப் போட்டிகள் நடைபெற்றுள்ளமை குறிப்பிடத்தக்கதாகும்.

• ஆசிய விளையாட்டுப் போட்டியில் (1962ஜகார்த்தா) தங்கப்பதக்கம் வென்ற முதல் மலேசிய வீரர் DR.மணி ஜெகதீசன்.

• ஆசிய விளையாட்டுப் போட்டியில் (1951 புதுடில்லி) பதக்கம் வென்ற முதல் இலங்கை வீரர் மொஹமட் அக்பர். இவர் கோலூன்றிப் பாய்தல் போட்டியில் (3.38மீற்றர்) வெள்ளிப் பதக்கத்தினை வெற்றிகொண்டு சாதனை படைத்தார்.

• ஆசிய விளையாட்டுப் போட்டியில் (1958 டோக்கியோ) தங்கப்பதக்கம் வென்ற முதல் இலங்கை வீரர் நாகலிங்கம் எதிர்வீரசிங்கம் ஆவார். இவர் உயரம் பாய்தல் போட்டியில் (2.03மீற்றர்) தங்கப்பதக்கத்தினை வெற்றிகொண்டு சாதனை படைத்தார்.

• ஆசிய விளையாட்டுப் போட்டியில் (1962 ஜகார்த்தா) பதக்கம் வென்ற முதல் இலங்கை வீராங்கனை நிர்மலா திசாநாயக்க. இவர் 200 மீற்றர் ஓட்டப்போட்டியில் வெண்கலப் பதக்கத்தினை வெற்றிகொண்டு சாதனை படைத்தார்.

 ***