Monday, March 9, 2015

ஆஸியிடம் பறிபோன இலங்கை அணியின் வெற்றி…!

11வது உலகக்கிண்ண சுற்றுத்தொடரில் "A" குழுவிற்கான  நேற்றைய ஆட்டம் (மார்ச் 8, 2015) அவுஸ்திரேலியா மற்றும் இலங்கை அணிகளுக்கிடையே அவுஸ்திரேலியாவின் சிட்னியில் நடைபெற்றது.  நாணயச்சுழற்சியில் வெற்றி பெற்ற அவுஸ்திரேலிய  அணி முதலில் துடுப்பெடுத்தாடி 50 ஓவர்கள் நிறைவில் 9 விக்கட் இழப்பிற்கு 376 ஓட்டங்களை பெற்றுக்கொண்டது.

அவுஸ்திரேலிய அணி சார்பாக ஸ்மித் 72 ஓட்டங்களினையும், கிளார்க் 68 ஓட்டங்களினையும், வொட்சன் 67 ஓட்டங்களினையும், மெக்ஸ்வெல் 53 பந்துகளில் 4 ஆறு ஓட்டங்கள், 10 நான்கு ஓட்டங்கள் அடங்கலாக 102 ஓட்டங்களையும் பெற்றுக் கொண்டனர்.

பதிலுக்கு துடுப்பெடுத்தாடிய இலங்கை அணி 46.2 ஓவர்களில் சகல விக்கட்களையும் இழந்து 312 ஓட்டங்களை மாத்திரம் பெற்று 64 ஓட்டங்களினால் தோல்வியைத் தழுவியது.  பின்வரிசை துடுப்பாட்ட வீரர்கள் துடுப்பாட்டத்தில் சாதிக்கத் தவறியதன் மூலம் இலங்கை அணியின் வெற்றி வாய்ப்பு பறிபோனமை குறிப்பிடத்தக்கதாகும்.

இலங்கை அணி சார்பாக திலகரத்ன டில்சான் 62  ஓட்டங்களினையும், தினேஸ் சந்திமால் (உபாதை காரணமாக ஆட்டத்தினை தொடரவில்லை) ஆட்டமிழக்காமல் 52 ஓட்டங்களினையும், குமார் சங்கக்கார 11 நான்கு ஓட்டங்கள் அடங்கலாக 104 ஓட்டங்களையும் பெற்றுக் கொண்டனர்.


பல்வேறு சாதனைகள் புதுப்பிக்கப்பட்ட இப்போட்டியில் நிகழ்த்தப்பட்ட சுவாரஷ்சியமான சில சாதனைகள் வருமாறு;

  • அவுஸ்திரேலிய அணியின் கிளென் மெக்ஸ்வெல் 51 பந்துகளில் சதத்தினை பூர்த்தி செய்தார். இது உலகக்கிண்ணத்தில் பெறப்பட்ட 2வது அதிவேக சதம் ஆகும். மேலும், அவுஸ்திரேலிய அணியின் வீரரொருவர் ஒருநாள் சர்வதேச கிரிக்கெட்டில் பெற்ற அதிவேக சதம் என்ற சாதனைக்குரியதாகும். இதற்கு முன்னர், ஜேம்ஸ் ஃபோக்னர் 2013ம் ஆண்டு இந்திய அணிக்கெதிராக 57 பந்துகளில் பெற்ற சதமே சாதனையாகவிருந்தது. 


உலகக்கிண்ண கிரிக்கெட் – அதிவேக சதம் பெற்ற வீரர்களின் விபரம்;
  • *50 பந்துகள் – கெவின் ஓ பிரையன் – அயர்லாந்து v  இங்கிலாந்து, 2011
  • *51 பந்துகள் – கிளென் மெக்ஸ்வெல் – ஆஸி v இலங்கை, 2015
  • *52 பந்துகள் – ஏபி டி வில்லியர்ஸ் – தென்னாபிரிக்கா v மே.தீவுகள், 2015
  • *66 பந்துகள் – மத்தியு ஹெய்டன் – ஆஸி v தென்னாபிரிக்கா, 2007
  • *67 பந்துகள் – ஜோன் டேவிசன் – கனடா v மே.தீவுகள், 2003
  • அவுஸ்திரேலிய அணி பெற்ற 376 ஓட்டங்களே உலகக்கிண்ணத்தில் அணியொன்று இலங்கை அணிக்கெதிராகப் பெற்ற அதிகூடிய மொத்த ஓட்டங்கள் என்ற சாதனைக்குரியதாகும்.
இதற்கு முன்னர், 1999ம் ஆண்டு இந்திய அணி பெற்ற 373/6 ஓட்டங்களே சாதனையாக பதிவாகியிருந்தது.
  • 376 ஓட்டங்களைப் பெற்ற அவுஸ்திரேலிய அணி, ஒருநாள் சர்வதேச கிரிக்கெட்டில் இலங்கை அணிக்கெதிராக அதிகூடிய மொத்த ஓட்டங்களை பதிவுசெய்தது. 
இதற்கு முன்னர், 2006ம் ஆண்டு அவ்வணி பெற்ற 368/5 ஓட்டங்களே சாதனையாக விளங்கியது.
  • இலங்கை அணி பெற்ற 312 ஓட்டங்கள் மூலம், உலகக்கிண்ண கிரிக்கெட் போட்டியொன்றில் அவுஸ்திரேலிய அணிக்கெதிராக 300 ஓட்டங்களை பெற்ற முதலாவது அணி என்ற சாதனையினை இலங்கை அணி படைத்தது.
  • உலகக்கிண்ண போட்டிகளில் தொடர்ச்சியாக 3 சதங்களைப் பெற்ற முதலாவது வீரர் என்கின்ற சாதனையினை இலங்கை அணியின் குமார் சங்கக்கார படைத்தார்.
105* v பங்களாதேஷ்
117* v இங்கிலாந்து
104 v அவுஸ்திரேலியா
  • ஒருநாள் சர்வதேச கிரிக்கெட்டில் 14,000 ஓட்டங்களை கடந்த 2வது வீரர் என்கின்ற பெருமையினை இலங்கை அணியின் குமார் சங்கக்கார பெற்றார். இந்த இலக்கினை அடைய சங்கக்கார 378 இன்னிங்ஸ்களையும், சச்சின் டெண்டுல்கர் 350 இன்னிங்ஸ்களையும் எடுத்துக்கொண்டனர். சங்கக்காரவைப் போலவே சச்சினும் சதத்தின் மூலம் இந்த இலக்கினை அடைந்தமை குறிப்பிடத்தக்கதாகும்.  2006ம் ஆண்டு பாகிஸ்தான் அணிக்கெதிரான போட்டியில் சச்சின் இந்த சாதனையினை படைத்தார்.
  • இலங்கை அணியின் தினேஸ் சந்திமால் 22 பந்துகளில் பெற்ற அரைச்சதமானது உலகக்கிண்ணப் போட்டிகளில் இலங்கை அணி வீரர் ஒருவர் பெற்ற அதிக வேக அரைச்சதமாகும்.

***

Thursday, March 5, 2015

உலகக்கிண்ண சாதனைகளை புதுப்பித்த ஆஸி அணி…!


11வது உலகக்கிண்ண சுற்றுத்தொடரில் "A" குழுவிற்கான  நேற்றைய நாள் ஆட்டம் (மார்ச் 4, 2015) அவுஸ்திரேலியா மற்றும் ஆப்கானிஸ்தான் அணிகளுக்கிடையே அவுஸ்திரேலியாவின் பேர்த்தில் நடைபெற்றது. நாணயச்சுழற்சியில் வெற்றி பெற்ற ஆப்கானிஸ்தான் அணி களத்தடுப்பினை தெரிவுசெய்ய, முதலில் துடுப்பெடுத்தாடிய அவுஸ்திரேலிய அணி 50 ஓவர்கள் நிறைவில் 6 விக்கட் இழப்பிற்கு சாதனைமிகு 417 ஓட்டங்களை பெற்றுக்கொண்டது.
அவுஸ்திரேலிய அணி சார்பாக ஆரம்பத் துடுப்பாட்ட வீரர் டேவிட் வோர்னர் 133 பந்துகளில் 5 ஆறு ஓட்டங்கள், 19 நான்கு ஓட்டங்கள் அடங்கலாக 178 ஓட்டங்களினையும், ஸ்மித் 95 ஓட்டங்களினையும், மெக்ஸ்வெல் 39 பந்துகளில் 7 ஆறு ஓட்டங்கள், 6 நான்கு ஓட்டங்கள் அடங்கலாக 88 ஓட்டங்களையும் பெற்றுக் கொண்டனர்.

பதிலுக்கு துடுப்பெடுத்தாடிய ஆப்கானிஸ்தான் அணி 37.3 ஓவர்களில் சகல விக்கட்களையும் இழந்து 142 ஓட்டங்களை மாத்திரம் பெற்று சாதனைமிகு 275 ஓட்டங்களினால் தோல்வியைத் தழுவியது. பந்துவீச்சில் மிச்செல் ஜோன்சன் 22 ஓட்டங்களுக்கு 4 விக்கட்களை வீழ்த்தினார்.

பல்வேறு சாதனைகள் புதுப்பிக்கப்பட்ட இப்போட்டியில் நிகழ்த்தப்பட்ட சுவாரஷ்சியமான சில சாதனைகள் வருமாறு;
*அவுஸ்திரேலிய அணி பெற்ற 417 ஓட்டங்களே உலகக்கிண்ண கிரிக்கெட் போட்டியொன்றில் அணியொன்று பெற்ற அதிகூடிய மொத்த ஓட்டங்கள் என்ற சாதனைக்குரியதாகும்.
இதற்கு முன்னர், 2007ம் ஆண்டு இந்திய அணி, பெர்முடா  அணிக்கெதிராக பெற்ற 413 ஓட்டங்களே சாதனையாக பதிவாகியிருந்தது.

உலகக்கிண்ண கிரிக்கெட் – அணியொன்று பெற்ற அதிகூடிய மொத்த ஓட்டங்களின் விபரம்;
  • அவுஸ்திரேலியா  417/6 V ஆப்கானிஸ்தான், 2015
  • இந்தியா 413/5 V பெர்முடா, 2007
  • தென்னாபிரிக்கா 411/4 V அயர்லாந்து, 2015
  • தென்னாபிரிக்கா 408/5 V மே.தீவுகள், 2015
  • இலங்கை 398/5 V கென்யா, 1996

* வோர்னர் பெற்ற 178 ஓட்டங்கள், உலகக்கிண்ண கிரிக்கெட் போட்டியொன்றில் ஆஸி அணியின் வீரரொருவர் பெற்ற அதிகூடிய ஓட்டங்கள் என்ற சாதனைக்குரியதாகும். இதற்கு முன்னர், ஷேன் வொட்சன் 2007ம் ஆண்டு மே.தீவுகள் அணிக்கெதிராக பெற்ற 158 ஓட்டங்களே சாதனையாகவிருந்தது. மேலும், அவுஸ்திரேலிய மண்ணில் அவ்வணி வீரரொருவர் பெற்ற அதிகூடிய ஓட்டங்கள் என்ற சாதனையினையும் வோர்னர் தனதாக்கினார். இதற்கு முன்னர், மார்க் வோ 2001ம்ஆண்டு மே.தீவுகள் அணிக்கெதிராகப் பெற்ற 171 ஓட்டங்களே சாதனையாகவிருந்தது.

* ஆஸி அணி 275 ஓட்டங்களினால் வெற்றி பெற்ற வெற்றியின் மூலம், உலகக்கிண்ண கிரிக்கெட்டில் அதிகூடிய ஓட்ட வித்தியாசத்தில் வெற்றி பெற்ற அணியாக ஆஸி சாதனை படைத்தது.
உலகக்கிண்ண கிரிக்கெட் – அதிகூடிய ஓட்ட வித்தியாசத்தில் வெற்றி பெற்ற அணிகளின் விபரம்;
  • 275 ஓட்டங்கள், ஆஸி V ஆப்கானிஸ்தான், 2015
  • 257 ஓட்டங்கள், இந்தியா V பெர்முடா, 2007
  • 257 ஓட்டங்கள், தென்னாபிரிக்கா V மே.தீவுகள், 2015
  • 256 ஓட்டங்கள், ஆஸி V நமீபியா, 2003
  • 243 ஓட்டங்கள், இலங்கை V பெர்முடா, 2007
  • 231 ஓட்டங்கள், தென்னாபிரிக்கா V நெதர்லாந்து, 2011

* ஆஸி அணியின் வோர்னர், ஸ்மித் ஜோடி 2வது விக்கட் இணைப்பாட்டமாக பெற்ற சாதனைமிகு 260 ஓட்டங்கள் மூலம் ஒருநாள் சர்வதேச கிரிக்கெட்டில் ஆஸி அணியின் சார்பாக எந்தவொரு விக்கட்டிற்குமான மிகச்சிறந்த இணைப்பாட்ட ஓட்டப்பெறுதி ஆகும். இதற்குமுன்னர், 2009ம் ஆண்டு ரிக்கி பொண்டிங், ஷேன் வொட்சன் ஜோடி இங்கிலாந்து அணிக்கெதிராகப் பெற்ற 252* ஓட்டங்களே சாதனையாகவிருந்தது.


* ஆப்கானிஸ்தான் அணியின் தவ்லாத் ஸத்ரான் 10 ஓவர்களில் 101 ஓட்டங்களை வாரி வழங்கினார். இதன்மூலம், உலகக்கிண்ண கிரிக்கெட்டில் பந்துவீச்சாளர் ஒருவர் 100+ ஓட்டங்களை வழங்கிய 3வது சந்தர்ப்பம் இதுவாகும்.

  •  மார்டின் ச்நேட்டேன், 12-1-105-2, நியூசிலாந்து V இங்கிலாந்து, 1983
  • ஜேசன் ஹோல்டர், 10-2-104-1, மே.தீவுகள் V தென்னாபிரிக்கா, 2015
  • தவ்லாத் ஸத்ரான், 10-1-101-2, ஆப்கானிஸ்தான் V ஆஸி, 2015

* ஆஸி அணியின் கிளென் மெக்ஸ்வெல் 18 பந்துகளில் அரைச்சதத்தினை பூர்த்தி செய்தார். இதுஉலகக்கிண்ணப் போட்டிகளில் பெறப்பட்ட 3வது அதிக வேக அரைச்சதம் ஆகும்.

***
Blog Widget by LinkWithin